PNTL kaptura autór na'in-rua iha área Baucau Segundu Komandante PNTL Munisípiu Díli, Superintendente Asistensia Euclides Belo, hateten bazea mandadu detensaun husi Tribunal númeru 0642/20 DICMR, Komandu Munisípiu Díli kontinua buka tuir suspeitu membru grupu Nakroma ba krime furtu agravadu ne'ebé durante ne'e na'ok veatura.

Euclides hatutan, hosi informasaun ne'ebé hetan, iha loron Kuarta (24/02) PNTL Munisípiu Dili no Baucau konsege kaptura tan autor na'in-rua iha área Baucau no direitamente transfere ba Komandu Munisípiu Díli hodi halo prosesu investigasaun no detein 72 oras antes submete ba Tribunál hodi tuir prosesu julgamentu.

"Komandu PNTL Munisípiu Díli koordena ho Komandu PNTL Munisípiu Baucau kaptura suspeitu na'in-rua ho inisiál ADC no SRX ne'ebé sira nain-rua nia identidade estatutu sai detidu iha Komandu PNTL Munisípiu Díli," dehan Euclides iha Komandu PNTL Munisípiu Dili, Kaikoli, kinta (25/02).

Euclides akresenta, arguidu hirak ne'ebé antes ne'e PNTL kaptura bainhira servisu hamutuk ho Ministeiru Públiku (MP) hamutuk ona na'in-15, hosi 15 pesoas ne'e na'in-5 Tribunál aplika medidia koasaun prizaun prenventiva, na'in-3 Tribunál aplika medidia koasaun periódika, na'in 1 tama ona prizaun tanba ebvolve iha kazu seluk tán, na'in-2 daudaun ne'e detein no na'in-3 seluk PNTL sei buka tuir hela.

Entertantu evidénsia ba arguidu sira na'ok mak veatura motorizada hamutuk 28 ne'ebé 27 iha ona MP no 1 daudaun ne'e iha PNTL Munisípiu Dili no iha Taxi 1, enkuantu iha ona vítima ka lezada na'in 9 no sasin 13 ne'ebé mak parte PNTL rona ona sira-nia deklarasaun.(*)