Hafoin simu tiha advokasia husi Ministériu Saúde, Xefe estadu Maior F-FDTL, Coronel Calistro Santos Coli"Coliati" hateten, Vasina ne'e importante tebes ba ema hotu, tanba moras ida Corona ne'e preokupasaun mundu ninian inklui Timor-Leste.

Ministeru Saúde halo kooperasaun ho departamentu de saúde husi F-FDTL nian hamutuk ho Organizasaun Mundial Saúde (OMS) ho UNICEF halo sorumutu ida iha kuartel Jeneral ho objetivu atu fahe informasaoens liu-liu kona-bá advokasia introdusaun vasina covid-19.

Husi adovokasia ida ne'e atu fó hatene ba membru F-FDTL nian atu bele komprende didi'ak kona-bá vasina.

"Sein dúvidas militar Sempre prontu iha kualker ora hodi simu vasina", dehan Coronel Calistro iha Quartel Jeneral F-FDTL Fatuhada, tersa(23/2).

Vasina ne'e importante, atu ema hotu bele defende aan hasoru moras Covid-19 ne'ebé sai preokupasaun ba mundu.

"Portantu ba preokupasaun sira ne'e hotu maka ita-nia estadu, governu, liu-husi OMS halo programa ida kona-bá vasina", informa Xefe Esatdu Maior F-FDTL ne'e.

Nune'e mos Ofisial Programa Imunizasaun Ministeru Saúde Manuel Maussiry akresenta, governu agora servisu maka'as hela atu halo introdusaun vasina ba Timor-Leste.

"Objetivu atu fó informasaun ba públiku sira liu-husi instituisaun relevante sira para ita tama iha implementasaun vasina la iha tan dúvidas oi-oin kona-bá vasinasaun ne'ebé ita atu uza", dehan nia

F-FDTL mós hanesan instituisaun ida dalabarak liu fronline iha parte ne'ebé mak atende servisu públiku sira hotu.

"Objetivu primeiru mak fó formasaun ba sira (F-FDTL) kona-bá vasina ne'ebé sei mai, para to'o iha implementasaun ema hotu intera kona-bá vasina ne'e rasik", dehan Nia.

Nia hatutan, segundu sai mós hanesan kanal ida atu tatoli informasaun ne'e ba ema hotu ne'ebé mak la hetan oportunidade atu tuir advokasia iha momentu sira ne'e.

Nune'e, Vasina Astrazeneca's implementa iha Timor-Leste sei hahu iha fulan abril tinan 2021.

"Vasina ne'e rasik sei hahu iha loron 7 Abril 2021", tenik Nia. (*)