Diretór Ezekutivu, Fundasaun Mahein (FM) João Almeida, konsidera kazu tiru komunidade nia karau iha Bobonaro ne'e sériu, no komandu F-FDTL tenke toma medida sira-ne'ebé nesesáriu bazeia ba regulamentu diiplinár militár nian.

Nia hatete, bainhira iha prosesu investigasaun mak identifika mosu indísiu kríme ruma, tenke loke mós prosesu kriminal hasoru komportamentu sira-ne'ebé ajente F-FDTL sira komete.

"Tanba ida-ne'e maka rekomendasaun Fundasaun Mahein nian maka, komandu F-FDTL nune'e mós Ministériu Defeza, Parlamentu Nasionál liuliu komisaun B ne'ebé trata asuntu defeza ho seguransa nian atu kontrola kontrola membru sira uza arma", dehan João Almeida iha nia kna'ar-fatin, Bairro dos Grilhos, kinta (18/02).

Nia hatutan, kazu tiru komunidade nia karau la'ós foin akontese, maibé iha fulan-janeiru mós akontese kazu hanesan iha munisípiu Manufahi.

Nia dehan, bainhira iha investigasaun disiplinár, mak iha indísiu kriminál ruma hasoru membru ne'e, husu atu loke mós prosesu kriminál.

"Bainhira utiliza arma la tuir regra, iha mós regra atu aplika, tantu prosesu disiplinár, nune'e mós prosesu kriminal," dehan nia.(*)