Tempotimor (Dili) - Xefe Estadu FALINTIL-FDTL, Majór Jenerál Lere Anan Timur, hateten durante fulan 2 no 3 ona forsa laiha osan tanba ne'e mak membru forsa armada sira hahú deve ona nesesidade bázika.
Jenerál Lere dehan situasan hirak ne'e mosu halo hodi rezolve nesesidade ne'e mak deve mos di'ak, Timor hotu-hotu hamlaha forsa mós hamlaha ona.
"Agora deve hela fós, deve mina, tabaku mós deve, deve hotu," Lere informa ba jornalista sira iha Palasiu Prezidensiál, Bairu Pite, kuarta (10/2).
Lere informa, se ko'a osan ba interese estadu nia hanoin katak, ne'e kompetensia governu ninian la'ós nia kompeténsia
"Osan la'ós ha'u mak kaer la'ós instituisaun mak kaer, defeza kaer be hasai, la hasai ne'e problema sira nian", dehan Jenerál Lere.
Lere haktuir, buat foun mak halo relatóriu mas ida regulár ne'e Ministru Defeza mak hatene.
Lere fó ezemplu, problema hirak ne'e afeita liu-liu ba forsa sira iha fronteira ne'ebá, ke sira moris la'ós ho osan ransu, entaun sira dezaraska, ó-nia kabun mamuk buka para haan ida-ne'e mak sira halo.
"Mas ami-nia problema mak forsa tenki haan, forsa tenke iha roupa, forsa tenke iha transporte, operasionál no administrativa no forsa tenke iha kilat, forsa tenke iha infraestrutura," Lere hatutan.
Jenerál informa, medida ne'e hotu orsamentu, ne'ebé orsamantu 2021 seidauk sai, sira sei uza orsamentu 2020 ninian.
"Ema dehan deve ne'e la'ós ha'u Lere mak deve, deve ne'e mak F-FDTL mak deve, aban bainrua ó mai husu deve ne'e nusá, ida-ne'e sira konfia," Lere esplika.(*)