Komandu Polísia Nasionál Timor-Leste (PNTL) simu notifikasaun husi governu liuhusi Ministériu Justisa (MJ) hodi hamutuk ho ekipa integradu husi Diresaun Nasionál no Terras Propriedade (DNTP) informa ba autoridade lokál hanesan Xefe Aldeia no Xefi Suku Kaikoli, inklui família uma-kain hamutuk 11 ne'ebé sai afetadu ba konstrusaun edifísiu foun ba kuartél jerál PNTL nian.
Komandante PNTL, Komisáriu Faustino da Costa, esplika notifikasaun refere, la'ós komandu mak fó, maibé parte governu liuhusi MJ nian mak hasai.
Nia haktuir, bazeia ba prosedimentu ne'ebé iha katak, notifikasaun fó ba komunidade sira to'o dala-tolu. Iha dahuluk, hato'o ba komunidade afetadu sira katak, durante loron tulu-nulu (30), sira tenke hamamuk ona sira-nia fatin hodi hodi fó tempu ba kompañia atu hahú ona prosesu konstrusaun.
Maibé, sé durante loron 30 nia laran nee maka komunidade sira seidauk sai husi sira nia hela fatin, governu sei tolera hodi fó tan notifikasaun dala-ida, ba prazu loron 30 tan.
Nia dehan, bainhira iha notifikasaun dala-rua tuiuir malu maka komunidade sira nafatin seidauk hamamuk hela fatin, governu sei fó tán notifikasaun ba dala-tolu, maibé ho prazu tempu loron sanulu de'it atu hamamuk ona sira-nia uma, tanba ne'e nia husu ba komunidade sira atubele koopera.
"Husu komunidade sira ne'ebé klaru ita hatene katak balu afeta ka implika ba iha konstrusaun komandu nian ne'e, entaun koopera ba para buat ruma ne'ebé Ita boot sira hetan, Ita boot sira bele sai ho saida, para fatin ne'e kontinua ba iha konstrusaun," Komisáriu Faustino da Costa ko'alia hafoin enkontru semanál ho PR "Lú-Olo" iha Palásiu Prezidensiál, Ai-tarak Laran, kinta (04/02).
Tuir nia, sé iha notifikasaun ikus maka komunidade sira kontinua hela metin iha sira-nia hela fatin, bele prezudika ba PNTL atu halo konstrusaun ne'e.
Nia hatete, PNTL hanesan instituisaun estadu ida ba ema hotu no ba povu TL tomak, tanba ne'e importante mak komunidade sira iha konsiénsia hodi koopera.
"Ne'ebé 30 dias dala-rua ne'e hotu ona, agora fó tan 10 dias ultimu para sira atu koopera halo nusá para sira bele husik fatin ne'ebá, ou sira prontu atu simu apoiu ne'ebé husi estadu deside," tenik nia.
Entretantu, antes ne'e iha loron segunda (01/02), liuhusi konferénsia imprénsa, Portavóz Komunidade afetadu, Rogério Marçal deklara, hanesan rai na'in, durante ne'e seidauk satisfeitu no konfuzaun hela tanba durante tinan barak nia laran prosesu negosiasaun ne'ebé sira halo ho estadu rasik seidauk iha solusaun, no laiha mós konkordánsia ruma kona-ba folin rai, uma no ai-horis (bein imovel).
Nia dehan, hanesan rai na'in konkorda no koopera hodi husik mamuk sira-nia fatin, tanba dezenvolvimentu ne'ebé mak planeadu ona.
"Maibé, tenke la'o tuir prosesu normál ne'ebé iha sistema pagamentu ida di'ak, atu nune'e labele husik hela insatisfasaun no konfuzaun mai ami komunidade rasik", hatete Rogério Marçal iha Aldeia 01 Sentru ba Unidade, Suku Kaikoli, Postu Verra Cruz, Munisípiu Dili, segunda (01/02).(*)
