Marcelina hatete, kliníka PNTL hahú husi tinan 2020 halo sensibilizasaun kona-ba moras hada'et no la hada'et inklui halo konsultasaun jerál (cek up) ba membru PNTL iha Munisípiu 11 no finilza iha tinan 2021.
"Tuir estatístika PNTL nian ne'ebé ke rejista iha klínika PNTL rasik halo liuhusi konsultasaun jerál, hahú husi tinan 2020 moras kista mak númeru primeiru, segundu ipertensaun (hipertensi), terseiru kastestis ka stomach, moras tolu ne'e númeru sa'e," dehan Marcelina iha Komandu PNTL Munisípiu Dili, Kaikoli, Kinta (04/02).
Marcelina akresenta, kliníka PNTL rasik nafatin kontinua cek up ba membru PNTL sira atu nune'e identifika moras no kontinua halo tratamentu ho intesivu no tratamentu husi doutór espesialista sira.
Marcelina hatutan, ai-moruk iha klínika PNTL sufisiente tanba hetan alokasaun osan liuhusi Komandu PNTL no apoia ai-moruk husi Ministériu Saúde.
Iha fatin hanesan, Komandante PNTL Munisípiu Dili, Superintendente Xefe Henrique da Costa, husu atu programa sensibilizasaun kona-ba moras hadaet no la hadaet inklui cek up ba PNTL kontinua nafatin mínimu fulan 3 ka 6 dala-ida.
"Tenke kontinua nafatin para atu nune'e ita-nia membru sira-ne'ebé mak lori moras ruma identifika iha ne'e tenke hetan tratamentu ba kontinuasaun," dehan Henrique.
Henrique hatutan, Komandu Munisípiu Dili rejista iha membru na'in-lima (5) ne'ebé la tama servisu permanente tanba relasiona ho kondisaun saúde.
Entertantu, Henrique rasik orienta atu membru PNTL sira-ne'ebé iha parte komandu munisípiu Dili nian tenke cek up hotu, enkuantu eskuadra Atauru mak parte saúde PNTL sei direita ba halo cek up iha-ne'ebá. (*)