Iha loron segunda (01/02), Deputada Bankada FRETILIN, Maria Angélica Rangel, fó-sai deklarasaun ida katak sira simu informasaun husi komunidade balu iha munisípiu Manatuto informa katak, iha loron domingu (31/01), PNTL sira fó seguransa ba ema-boot ninia oan ne'ebé hala'o viajen husi Baukau, Manatuto no liu mai Dili.

Ba deklarasaun ne'e, Komisáriu Faustino da Costa konsidera laloos, tanba PNTL sla'ós halo fali seguransa ba ema boot sira-nia, maibé fó seguransa ba grupu desportiva ida ho naran "Sport Cup", entre sira-ne'e mesak timoroan ne'ebé molok ne'e hato'o karta koñesimentu ba Polísia atu ajuda fó hela seguransa ba sira nia atividade.

"Grupu ne'e hanaran Sport Cup. Ha'u hanoin la'ós dehan katak "kawal" ema boot nia-oan ka ema riku nia-oan, mais ida-ne'e iha grupu ida ke mai duni katak sira atu halo atividade ida," Komisáriu Faustino da Costa ba jornalísta sira iha Hotel Tower, Fatuhada, kuarta (03/02).

Nia haktuir, bainhira pedidu husi grupu "Sport Cup" ne'e tama iha sira-nia fatin, sira mós haree fila-fali ba dekretu governu nian ne'ebé regula kona-ba EE ba dala-sia nian katak suspensaun ba atividade desportiva no kulturál sira hotu.

"Maibé, alterasaun dekretu governu ne'e iha kedas dia 15 janeiru ne'e, agora pedidu ne'e tama iha 26 ou 27, entaun atividade halo iha loron ikus janeiru nian," dehan nia.

Komandante Jerál PN ne'e aprezenta ona relatóriu ba governu, liuhusi Vise-Ministru Interior (MI) nomós Primeiru Ministru (PM), Taur Matan Ruak, ne'ebé nu'udar mós Ministru Interior (MI).

Maske nune'e, nia dehan, PNTL hanesan instituisaun estadu ida-ne'ebé atu fó seguransa ema hotu.(*)