“Ha'u konkorda no suporta duni alterasaun ida-ne'e tanba lei tenke tuir realidade ne'ebé akontese iha FALINTIL-FDTL. Ha'u fó parabéns ba Ministru Defeza ne'ebé tenta altera lei defesa nasionál, sé bele haree mós lei seguransa nasionál no lei seguransa interna tanba pakote ka interligadu,” JTP informa ba www.tempotimor.com, iha Dili, kinta (28/1)
Eis Sekretáriu Estadu Defeza ne'e esplika, redusaun ba komponente sira importante tanba durante ne sentru formasaun no komponente apoiu servisu tenke tolu (3) de'it.
Tuir nia, di'ak liu komponente tolu de'it hanesan mós nasaun sira seluk iha mundu.
Júlio Tomás Pinto dehan, lei sempre adapta nia-aan ba situasaun reál nasaun nia no dinámika forsa armada nian.
Nia fundamenta, artigu hamutuk 12 iha LDN no iha artigu balun ko'alia kona-ba Organizasaun Estrutura Superiór no Admnistrativa Forsa Armada nian.
"Ita sidauk hatene loloos saida mak atu altera husi artigu hirak ne'e mas ha'u hanoin ministru haree hela lakunas balun ne'ebé persiza hadi'a. Maibé importante mak reforsa kapasidade forsa armada nian iha ameasa externa no kapasidade hodi apoiu polítika externa estadu nian," nia katak.
Nune'e mós nomeasaun ba estrutura másimu ihA F-FDTL ne'e kompeténsia Prezidente Repúblika nian.
Eis Sekretáriu Estadu Defeza iha IV Governu Konstitusionál ne'e fó apresiasaun ba Ministru Defeza Filomeno Paixão de Jesus, ne'ebé koñese di'ak situasaun forsa armada nian. (*)