Tuir dadus husi Provedoria Direitus Humanus no Justisa  (PDHJ) ne'ebé públika iha tinan 2018, membru PNTL komete kazu violasaun direitus umanus hamutul 413.

Ezemplu ba kazu balun ne'ebé pesoal polisia komete mak kazu tiru-mate joven ida iha Bebonuk no Pantai Kelapa, no kazu ne'ebé xoke ema barak mak trajedia Kuluhun ne'ebé hamate joven nain lima.

Ironia tebes haree ba realidade ne'e tanba polisia ne'ebé loloos asegura komunidade nia moris hakmatek, proteze no defende husi asaun violasaun sai fali autór ba violasaun.

Ho realidade ne'e, Ministru Defeza no Ministru Interiór Filomeno Paixão leba hela misaun ida atu hamoos instituisaun PNTL husi ema sira ne'ebé uza no aproveita 'povu-nia' farda ne'ebé sira hatais no kilat ne’ebé sira kaer hodi 'oho' fali povu.

Ministru Paixão deklara sei halo limpeza ba membru Polísia Nasional Timor Leste (PNTL) ne'ebé la obedese ba regra instituisaun nian.

"PNTL la viola direitus umanus maibé ema sabraut sira mak viola. Ema sabraut sira ne'e tenke limpeza hotu kedas. Ho ha'u sei limpu hotu, ha'u la halimar ho sira, bainhira la'o loos ona ka populasaun hotu tuun mai dehan PNTL la presiza ona, di'ak liu taka tiha de'it, labele mai halo sabraut fali, tanba ne'e ita tenke tuur hamutuk hodi hadia", dehan Ministru Paixão iha palásiu prezidensial Bairro-pite, Tersa (21/05/2019).

Eis Brigadeiru Jeneral F-FDTL ne'e konsidera problema iha PNTL mak problema regra disiplinar ne'ebé la loos, nune'e membru polísia repete hahalok ne'ebé kontra lei.

Ministru dehan, regulamentu disiplinar tenke forte no defini klaru sansaun bainhira membru PNTL ida komete kazu indisiplinar.

"Regulamentu disiplinar mak sei defini bainhira mak ema ne'e hetan nia kastigu ida tuir medida ne'ebé nia simu par labele repete fali. Tanba durante ne'e regulamentu disiplinar la loos, ema ema repete fali," dehan Ministru Paixão.