Print this page

KHUNTO Husu UPF "Tiru Tohar" Sidadaun Hakur Fronteira Ho Ilegal

By January 27, 2021 2808
Membru Unidade Polisia Fronteira Membru Unidade Polisia Fronteira Foto Espesial

Tempotimor (Dili)-Xefe Bankada Kmanek Haburas Unidade Nasional Timor Oan (KHUNTO), Olinda Guteres husu ba Unidade Polisia Fronteira (UPF), wainhira haree sidadaun sira kontinua kontra no hakur ba mai iha fronteira, diak liu tiru tohar tiha nia ain.

Tuir nia, Kazu covid-19 iha nasaun vizinu indonezia, liu-liu iha NTT, Atambua, no Betun, kazu foun no ema mate husi covid-19, kada loron aumenta ba bei-beik.

Nia preokupa ho moras covid-19, tanba Atambua ho timor la dok malu, no la'os hodi tasi mak haketak, maibe ne'e mota mak haketak. Tanba ne'e nia hanoin atambua la'os dok husi timor, fasil atu moras covid-19 ne'e da'et mai iha rai laran.

"Sé mak kontra hodi nafatin tama mai timór, no sai ba atambua, maka husu ba seguransa sira ne'ebé iha fronteira, labele tolera no kaer kona sei fo sansaun rigorozu ba ema ne'ebé tama sai, bele-bele labele tiru mate, maibe tiru tohar ninia ain,"dehan xefe bankada KHUNTO Olinda Guteres iha debate renovasaun Estadu Emerjénsia (EE) ba dala-sanulu (X) iha plenariu Parlamentu Nasionál kuarta (27/01/21).

Nia sujere ba seguransa nasionál, hanesan PNTL, F-FDTL, no autoridade lokál, sira ne'ebé iha fronteira, munisipiu bobonaro, Suai no RAEOA, presiza kontrola dalan ki'ik, ne'ebé deskonfia ema tama sai ho ilegalmente.

Nune'e mos, Xefe bankada CNRT Duarte Nunes husu ba governu atu buka meius ruma hodi redus nesesidade populasaun sira ne'ebé hela besik iha fronteira.

Tanba, durante ne'e, populasaun sira dalaruma hakat ba fronteira depois fila mai, forsa sira kaer hanesan ilegál, ne'e hanesan situasaun ne'ebé kontinua, tanba liga ho sira nia nesesidade.

"Ida ne'e tanba saida, hau hanoin ita iha lider komunitáriu, OPS, sira presiza hatene saida mak halo konke ema sira ne'e tenke halai ba sorin kalan bo'ot sira ba dader sira fila kedas, eh tanba sira nia nesesidade,"dehan nia. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com