Komandan PNTL Dili ne'e informa, hafoin nia parte simu informasaun ne'e, Komando Munisípiu Dili (KMD) orienta kedas nia ekipa patrullamentu husi eskuadra Cristo Rei ba iha fatin refere no hetan duni iha sidadaun feto ida ho naran inisial JA (35) mak tama ilegalmente mai iha territóriu Timor-Leste (TL) iha loron sanulu ba kotuk.

"Entaun, ekipa konjunta hamutuk ho ita nia parte patrulla Cristo Rei ninian obrigatóriamente foti sidadaun ne'ebé tama ilegal ne'e ho uma-na'in ka família ne'ebé maka simu sidadaun ilegal ne'ebé hela iha ne'ebá ne'e, lori kedas ba iha fatin Kuarantena Tibar ninian", informa Komandante PNTL munisípiu Dili, Superintendente Xefi, Henrique da Costa ba iha nia kna'ar fatin Kaikoli, kuarta (27/01).

Nia hatutan, iha prosesu identifikasaun ba suspeitu ne'ebé tama ilegal ne'e, autoridade sira ne'ebé kompostu husi PNTL Dili hamutuk ho Ministeriu Saúde (MS) nian lori mós membru família hamutuk ema na'in sanulu ba iha fatin izolamentu iha Kuarantena Tibar durante loron sanulu-resin-haat hafoin kontinuasaun ba prosesu tuir mai.

"Polísia investigasaun ne'e, ita sei bolu sidadaun refere para hodi halo identifikasaun, kontinua prosesu, tanba saida maka nia tama ilegal, nia tama husi ne'ebé, Será ke nia sidadaun timor ka, nia agora sai sidadaun Indonézia ninian, depois ita sei buka tuir", dehan nia.

Nia mós husu ba família sira katak, bainhira iha sidadaun ruma ka sira nia família runa mak tama ilegál husi Indonézia mai TL, husu atu informa kedas ba ekipa MS ho PNTL atu lori kedas ema sira ne'e ba kumpri iha fatin izolamentu iha kuarantena sira, nune'e moras ne'e labele da'et fali ba ema seluk.

"Família sira labele simu i rai hela de'it sira, tanba karik hanesan ema hirak ne'e mak lori moras ruma, entaun nia sei hadaet ba família sira, i sei hadaet ba ema hotu", nia fó hanoin.(*).