Tempotimor (Dili)- Transporte nu'udar problema boot liu ba servisu operasionál, Polísia Nasionál Timor-Leste (PNTL) nian tanba viatura barak liu iha kondisaun aat hotu ona.

Komandante jerál PNTL, Komisáriu Faustino da Costa dehan, prosesu kontratasaun ba kompañia ne'ebé atu bele halo manutensaun ba viatura PNTL nian remata ona iha loron dia 31 fulan dezembru 2020 liubá, no hein de'it orsamentu.

"Agora, orsamentu iha ona, ita hato'o, propoin ida-ne'e ba governu para atu bele iha fali kompañia balu, para atende halo manutensaun ba viatura PNTL nian", Komisáriu Faustino da Costa ko'alia iha Komandu jerál PNTL Kaikoli, segunda (25/01).

Nia hatutan, husi orsamentu PNTL nian ne'ebé sira tau iha OJE 2021 nian, propoin mós osan atu sosa "peças", kareta nian.

"Ita iha orsamentu balu iha-ne'ebá, ita propoin para hola peças ruma, ezemplu hanesan pineu sira, ninia buat ki'ik oan sira ne'e para ida ne'ebé PNTL bele responde ho ida-ne'e, ita responde", dehan nia.(*)