Superiór ofisiál hamutuk na'in-48 ne'e kompostu husi komandante sira ne'ebé ho diviza Superintendente Xefe ne'ebé hala'o kna'ar nu'udár komandante iha munisípiu sira, kuadru superiór polísia sira-ne'ebé durante ne'e hala'o kna'ar iha Centru formasaun Akadémia polísia nian.

Serimónia Abertura graduasaun ba tinan letivu iha Centro Formaçăo Polícia (CFP) ne'e hala'o ho tema, "Reforsa Koñesimentu hodi implementa vizaun sentru exelente".

Segundu Komandante Jerál PNTL, Komisáriu Mateus Fernandes hatete, graduasaun ne'ebé hala'o sai hanesan momentu ida importante tebes ba PNTL hotu hodi partisipa iha serimónia graduasaun Diploma Jestaun Ezekutiva Polísia (DIPJEP), ne'ebé hala'o durante tinan ida fulan ualu iha Centru formasaun.

"Ita sente kontente tebes bainhira graduadu sira hatais toga ne'ebé nakonu tebes ho esperansa povu no estadu nian iha orden públika ba prosesu dezenvolvimentu nasionál Timor-Leste nian," dirkursu Segundu Komandante Jerál PNTL, Komisáriu Mateus Fernandes, bainhira halo abertura ba serimónia refere, iha Centro Formaçăo Polícia (CFP) ih Komoro, sesta (22/01).

Nia dehan, iha prosesu konstrusaun estadu, iha dezafiu oioin ne'ebé mosu no ejize ba ema hotu atu prepara-aan, nu'udár sidadaun, servidór ne'ebé kompetente tuir nesesidade mak nesesáriu hanesan komponente prinsipál ba estadu no nasaun.

Nia hatutan, haree ba dinámika sosiál no globál ne'ebé ema hasoru lor-oron, hanesan poténsia ameasa ida ba dezenvolvimentu TL nian.

Ho ida ne'e mak VIII Governu Konstitusional hasai planu espesífiku ho objetivu atu profesionaliza no moderniza instituisaun PNTL.

"Hanoin ida-ne'e halo ami kontente tebes tanba ami tomak hakarak liafuan ida profesional no modernu", dehan Mateus.

Tuir nia, atu dezenvolve PNTL governu presiza dezenvolve mós instituisaun interligadu sira seluk, atu nune'e kooperasaun servisu iha terrenu bele aliña hanesan.

Nia afirma, Timor-Leste ba oin presiza antesipa ezijénsia ho nesesidade tuir tempu atu nune'e bele hametin liután ezisténsia RDTL nu'udár nasaun no estadu atu fo moris di'ak ba nia Povu sira.

"Atu hetan ida-ne'e, presiza konkorénsia, koezaun, no konsiénsia ne'ebé koletivamente entre Timoroan hotu atu bele hamutuk hala'o dezenvolvimentu nasional ne'ebé di'ak, ho reziliénsia nasionál ne'ebé rezistente hodi fó moris di'ak ba povu no nasaun no prontu hasoru amesa husi rai laran no li'ur", nia fó hanoin.

Dala ida tan Mateus lori estrutura komandu PNTL nia naran ho kontente  agradese ba governu tan ba hakarak profesionaliza no moderniza polísia, katak Governu hahú define investimentu sustentabilidade ne'ebé nu'udár preokupasaun públiku ba PNTL durante hala'o ona sira-nia kna'ar, tenke neutru no lais, kualidade iha atuasaun ho alvu ne'ebé mútua loloos ho kooperasaun nian.(*)