Diretór Ezekutivu Fundasaun Mahein (FM), Joăo Almeida haktuir, bazeia ba planu forsa 2020 nian, katak tekrutamentu membru F-FDTL tenke atinje to'o rihun tolu-atus-neen (3.600), efetivus.

Nia dehan, loos duni katak planu forsa 2020 ninian implementasaun remata ona iha tinan kotuk (2020), maibé tanba membru efetivu seidauk to'o númeru 3.600, nune'e governu planeiadu atu halo tan rekrutamentu ba membru foun hodi bele kompleta, maibé nia husu atu fó prioridade ba iha komponente navál.

Nia hatete, durante ne'e TL iha rikusoin tasi nian barak tebes, maibé governu rasik abandona, tanba ne'e, nia husu atu halo rekrutamentu tenke investe iha komponente navál ninian hodi kontrola timor nia rikusoin iha rasi-laran.

"Entaun, rekrutamentu ne'e atu hatán ba nesesidade sira ne'e. Purke ita haree iha komponente naval, ita dehan ita iha tasi, mais ita abandona tasi liu liu peska ilegal iha tasi-mane kontinua. Mezmu ita dehan ita nia futuru mak tasi, tasi ida fó moris ba ita nee, ita abandona tiha", Joăo Almeida hateten iha nia knaar fatin, tersa (18/01).

Nia hatutan, governu tenke investe iha komponente navál atu halo servisu iha tertitóriu tomak tasi nian, pure-zemplu iha F-FDTL liu-liu komponente navál, presíja rekursu,

"La'os ema de'it, materiais mós, ró ne'ebé ita hola labele ba tasi-mane, ita laiha portu. Portu ne'ebé ita halo, mout tiha", nia dehan.

Tanba ne'e, bazeia ba planu governu nian liuhusi Ministériu Defeza (MD) hodi rekruramentu, iha duni nesesidade atu bele hatán ba TL nia interese sira ne'e hotu.

"Tuir fundasaun Mahein nia haree, komponente navál importante teb-tebes. Purke hanesan ohin koalia katak, ita nia futuru iha tasi, mais tasi abandona, peska ilegál kontinua iha ita nia tasi, estimasaun ministériu agrikultura nian, kada tinan ita lakon maizumenus 250 milloens ba leten, ida ne'e ita sofre boot, bainhira ita la kuidadu", nia fó hanoin.(*)