Komadante Jeral PNTL, komisariu Faustino da Costa hateten katak, imajen karau mate ne'ebe viral iha media sosial ne'e imajen iha tinan hirak liu-ba, la'os foin akontese.
"Ne'e atu dehan de'it, buat ne'e informasaun dalaruma ita simu, ha’u nia portavoz mos hato'o ona, ekipa ba tantu husi parte PNTL nomos ita nia F-FDTL postu ne'ebe destakadu iha ne'eba ba hasoru duni Padre ko'alia ida ne'e", Faustino hateten lia hirak ne’e hafoin sorumutu ho Primeiru Ministru Taur Matan Ruak iha palasiu governu, tersa (19/01).
Komjer afirma, Amu Lulik ne'ebe publika fali foto komunidade nia karau mate ne'e, husu ona deskulpa katak, imajen ne'e la'os foin akontese, maibe liu ona iha tinan hirak liu-ba.
"Mais ita boot sira kala akompana iha media social, Amu rasik divulga katak, nia husu deskulpa, tanba buat ne'e foto ne'ebe iha tinan balun ba kotuk nian mak nia foti re-post fila-fali", nia haktuir.
Antes ne'e, komunidade kestiona kona-ba karau ne'ebe mate tanba deskonfia tiru ho kilat. (*)