Tuir observasaun jornalista tempotimor nian iha terrenu nota katak, maizumenus tuku 8:10 membru polísia tránzitu hala'o pasa revista iha portu Dili nia oin la profísional, tanba ema balun ne'ebé laiha dokumentu no laiha karta kondusaun, maibé tránzitu sira koñese ne'e husik liu de'it, prende de'it mak sira-ne'ebé sira la koñese.
Pesoa ida-ne'ebé hetan mós prende husi polísia tránzitu, Juvinal da Cruz informa, sira balun dokumentu laiha no karta kondusaun mós laiha maibé polísia koñese no dalaruma sira-nia família ne'ebé haruka ba tiha de'it.
"Polísia sira-ne'e tilan ema, ida sira koñese ne'e la tahan nia motorizada, padahal sira ne'e mós poísia tilan ami hamutuk, sira balun sim ho surat laiha polisia haruka ba tiha, tahan hela de'it mak ami", Nia informa iha portu Dili nia oin, kinta (14/01).
Nia hatutan, balun polísia prende tiha kontaktu ba nia maun sira mai foti tiha.
"Balun polísia tilan tiha telfone ba sira-nia maun foti tiha de'it, ami mak sira tahan hela, polísia labele halo hanesan ne'e, tilan ne'e tilan hotu, labele husik balun liu de'it", nia dehan
Iha fatin hanesan, feto ida polísia tránzitu prende tiha ninia motorizada ne'ebé dokumentu no sim laiha, maibé tanba de'it dehan atu ba hare ninia família moras iha Hospital Nacional Guido Valadares (HNGV), entaun husik ba tiha.
"Maun, hau-nia amá moras iha ospitál atu ba haree, maun bele ajuda ha'u ga lae," feto ne'e husu harohan ba ba membru polísia tránzitu.
Membru polísia tránzitu ne'e fó resposta ho nune'e "Ok, ha'u bele ajuda, maibé ajuda o de'it, o nia maun nia motorizada hela", resposta membru polísia tránzitu ne'e ba feto-oan ne'e.
Iha atividade pasa-revista ne'e, polísia tránzitu baku membru F-FDTL ida ne'ebe uza roupa sívil ho motorizada Vixon Rider kór mutin iha fatin refere tanba de'it ko'alia hasoru hafoin prende lutu nasaun ne'e ninia motorizada.
Nune'e, liu oras balun de'it Polísia Militár (PM) ho karreta isin ida to'o kedas iha fatin pasa-revista portu Dili nia oin, hodi ko'alia no rezolve ho polísia tranzitu.
Pasa revista ne'ebe halo iha portu Dili nia oin, polísia tránzitu prende motorizada kuaze 20-resin no lori hotu ona ba Komandu PNTL munisípiu Dili, Kaikoli. (*)
