Tempotimor (Dili)-Bazeia ba informasaun ne'ebé espalla atu ezonera Komandante Jerál Polísia Nasionál Timor-Leste (PNTL), Komisáriu Faustino da Costa, Ministru atuál Primeiru Ministru, Taur Matan Ruak la hatene.
Ministru Interiór (MI) atuál Primeiru Ministru (PM) Taur Matan Ruak, seidauk hatene kazu ezonerasaun Komjer PNTL, maibé informasaun refere espekula ona iha públiku.
"Kona-ba informasaun ezonerasaun Komandante Jerál PNTL Faustino da Costa ne'e ha'u la hatene", hateten Taur iha Palásiu Prezidensiál Bairu-pite Dili, Kinta (14/1).
Iha fatin hanesan, jornalista sira koko konfirma ho Komandante Jerál PNTL Faustino da Costa kona-ba isu ezonerasaun, maibé la Konsege tanba Komandante fila kotuk dadaun ba jornalista sira.
Iha loron 9 fulan ne'e, hatan ba jornalista sira trelasiona asuntu izonerasaun Komandante Jeral PNTL atual, Vise-Ministru Interior António Armindo dehan seida'uk bele ko'alia sai maibe nia informa de'it nune'e, "imi mos hatene eh".
Antes ne'e Xefe Estadu Maiór Jerál F-FDTL, Majór Jenerál Lere Anan Timur mós diskorda atu ezonera Komandante Jerál PNTL.
"Vise laiha konpeténsia ida, vise mak ko'alia atu ezonera. Mas ha'u dehan possa, Faustino joven ida, nia mandatu 2023 mak hotu, ita joven ne'e ezonera atu tau sé. Ha'u la aseita atu ezonera nia," dehan Lere. (*)
