Vise-ministru Interior, António Armindo hateten, Ministériu Interior orienta PNTL Unidade Patrollamentu Fronteira (UPF) atu hasa'e Patrollamentu iha fronteira liuliu área sira ne'ebé indentifikadu tama-sai ilegalmente hodi prevene pandemia Covid-19 iha Timor-Leste.
"Ita aumenta daudaun foin lalais ne'e ba sira ne'ebé servisu sekreta, tanba ne'e planu operasaun Polisia nian ne'ebé ita labele fo sai iha média," António hateten ba www.tempotimor.com iha Parlamentu nasional (PN) Dili, Tersa (12/01).
António husu atu pessoal sira ne'ebé atu halo movimentu utrapasa iha fronteira hein ho pasensia to’o bainhira governu deside loke hikas fronteira mak foin bele utrapasa fali liña fronteira ho legalmente.
"Fronteira governu loke ona ba mak ita tama mai, nune'e la’o tuir protokolu ne'ebé los para labele lori moras ne'e daet ba ita nia komunidade sira liuliu sira ne'ebé iha fronteira,” nia hateten.
António mós hatutan, governu rasik aplika koemas ba sidadaun sira ne'ebé mak utrapasa ilegalmente iha fronteira.
Antes Vise Ministru ne'e mos fo sai ona ba publiku kona ba nia parte deskonfia involvimentu membru PNTL balun hodi fasilita movimentu ilegal kontinua iha fronteira. Tuir nia movimentu Ilegal ne'ebe buras iha fronteira dala ruma bela afeita ba númeru kazu suspeitu pozitivu Covid-19 aumenta iha Timor-Leste.(*)