Lere Anan Timur hateten, fronteira rai ne’e área luan, tanba ne’e presiza garante seguransa atu labele mosu movimentu illegal husi Indonézia tama iha Timor-Leste no husi Timor-Leste ba Indonézia, keta sira lori moras mai, derepente mosu iha Lospalos ka Vikeke mak dehan covid-19, ne’e problema ona.
“Sorti be agora ema ida seidauk mate, mak mate karik sidadaun nia konsiénsia oinsa, konserteza pániku. Entaun ohin ha’u dehan ba Prezidente Repúblika katak, ha’u simu ona diretiva governu nian para reforsa seguransa fronteira rai nian. Maibé, reforsa fronteira la’ós efetivu militar de’it, maibé reforsa mós regra no regulamentu ba iha fronteira,” Lere hateten lia hirak ne’e iha Palásiu Prezidensiál Bairru-pite, Kuarta (6/1).
Veteranu nee afirma, ema ne’ebé iha nesesidade duni mak bele tama iha Timor hanesan ema ne’ebé kaer projetu boot ka lider igreja katólika nian, maibé agora atu faan bakso mós bapak mak mai, faan sasan dollar ida rua nian mós mauxina mak tenke mai, entaun governu mós tenke prevene situasaun ida ne’e.
“Timoroan mak mai ne’e oin seluk, mais timoroan balun mós aseita hodi governu haruka osan ba para sira hela iha ne’ebá lai, maibé kuandu simu tia ona osan, sira mai fali ne’e mós demais hotu, entaun presiza reforsa ida ne’e, para ita-tenke hatene, se mak merese tama no se mak labele tama,” nia dehan.
Lider fitun rua subliña, atu reforsa militar iha fronteira, nia parte sei koordena ho komandante sira para estabele tan postu provizóriu, kuandu korona virus sei iha.
Entretantu kona-ba membru hira mak sei asegura iha fronteira nia parte lahatene, maibé daudaun ne’e membru sira kontinua ativu iha fronteira rai parte Batugade, Balibo, Tilomar, Atulebos, Tunu-Bibi, Salele.
Nia mós informa katak, Prezidente Repúblika kontinua fó motivasaun ba Falintíl Forsa Defeza Timor-Leste (F-FDTL) no Polísia Nasionál Timor-Leste (PNTL) atu kontinua servisu hanesan defeza no seguransa ba povu no nasaun Timor-Leste.(*)