Segundu komandante PNTL Munisípiu Dili Euclides Belo hateten, PNTL kaptura joven sira ne'e, tanba komete fragrante delitu.

"Hodikalan mosu tentativa asaltu-malu ida iha área Lurumata nian ne'ebé mai husi grupu 77 no Kera Sakti, entaun PNTL konsege halo kapturasaun ba ema na'in 29, inklui objetu ba krime ne'ebé PNTL mós halo aprensaun," Euclides hateten iha nia knaar fatin, Kaikoli, Tersa (29/12).

Caption : Joven sira ne'ebé PNTL halo kapturasaun hodikalan ne'ebé forma hela iha resintu KMD hodi rona liafuan ruma husi Komandante PNTL Munisípiu Dili Superentendente xefe Henrique da Costa no Segundu komandante PNTL Munisípiu Dili Euclides Belo.

Tuir nia, objetu ba krime ne'ebé PNTL halo aprensaun mak hanesan katana ida, rama-ambon haat, fiska uza boraxa tolu no triplex halo hanesan pamen ida.

"Joven sira ne'e iha hela prosesu identifikasaun, entaun husi parte investigasaun komunika hela ho Ministériu Públiku (MP) para prosesu identifikasaun ne'e iha informasaun depois mak PNTL hein orientasaun formal husi MP kona-ba prosesu kontinuasaun," nia hateten.

Komandante ne'e mós afirma, atu kumpre oras 72 iha sela ne'e depende ba na'in ba prosesu MP mak fó orientasaun, PNTL só kumprimenta lei no orden.

Entretantu, joven sira ne'ebé PNTL kaptura mai husi aldeia 05 suku Fatuhada ne'ebé balun ho identidade hanesan estudante, negosiante no balun halimar de'it iha uma.

Alende ne'e, iha loron 24 kalan, mosu mós konfrontu entre joven sira iha aldeia no suku refere, ne'ebé PNTL halo netraliza situasaun, maibé iha mós sidadaun ida sai vítima, entaun kazu refere rezista ona iha komandu PNTL Munisípiu Dili ho númeru rejistu kriminál 0674/20DICMR.(*)