António Armindo hateten, karreta sanulu ne’e ministériu oferese hodi hasa’e vizibilidade no asegura seguransa durante tempu natal ho tinan foun.
“Maibé, kareta sira ne’e Komandu PNTL sei entrega hikas ba ministériu Interiór iha dia 3 Janeiru 2021,” Governante ne’e hateten via Whatsup (23/12).
Governante ne’e dehan, kareta uzadu ministériu nian ne’e baibain diretór nasionál, diretór jerál sira, xefia sira, mak uza, no vise ministru rasik hasai ona sirkulár atu entrega ba PNTL, ba atividade iha munisipiu Dili no munisipiu sira seluk, depende ba nesesidade.
“Kareta sira ne’e kargu xefia sira mak uza, maibé tempu natal ho tinan foun liu liu loron feriadu mak sira labele uza hodi ba PNTL uza temporáriu atu mantein seguransa. Tanba PNTL kareta ladun sufisiente atu kontrola seguransa ho masimu”, nia dehan.
Tanba ne’e nia mós hameno hela ba membru PNTL sira atu uza ho kuidadu ba servisu nasaun nian. (*)