Nia husu labele halo interpretasaun arbiru tanba lójikamente hanesan lei militar ne'e laos obrigatóriu maibé kontratadu ba soldadu sira. Nivel ofisiais sira tenke konkore ba permanente, tanba ne'e ema ne'ebé tama ona ba permanente tenke to'o tinan neenulu mak foin ba reforma. Maibé soldadu sira ne'e kontratu tinan hitu de'it.

Soldadu sira ne'ebé hetan kontratu tinan hitu ne'e laiha dalan para atu ba permanente, entaun polítika Ministru Defeza nian transfere fali ba polísia tanba sira ne'e treinadu.

Soldadu sira ne'e treinadu ona atu tiru ema, oho, baku no kaer ema, entaun ita haruka fila ba uma mós problema boot, no ema terorista sira bele aproveita sira.

"Entaun ida ne'e mak polítika Ministru Defeza nian no ha'u nia opiniaun mós, bainhira ita-nia soldadu sira nia kontratu hotu bele fasilita sira ba fali polísia para menus gastu ne'ebé ita halo no rekrutamentu laiha ona, maibé sira ba espesialidade deit", esplika Jeneral Lere, iha Palásiu Prezidensiál, Bairru-Pité, Kuarta (8/5).

Bainhira iha polísia mak fahe sira ba espesialidade hanesan polísia tranzitu, polísia komunitáriu mo seluk tan, inklui mós tempu to'o ona para atu tau forsa armada iha fronteira entre Timor-Leste ho Indonezia para iha balansu seguransa.