"Sim, iha lista deskonfia iha duni, ita fo tiha ona ba komandu desde fulan rua liuba, ne'eb’e ita hein desizaun husi komandu. Komandu fó ona demisaun ba nia, eh sei hein sira seluk par halo investigasaun", Antonio Armindo heteten ba jornalista hafoin hasoru-malu ho Primeiru Ministru (PM) no Ministru Interior (MI), Taur Matan Ruak iha palasiu governu, Tersa (15/12).
Nia esplika, buat deskonfia la signifika nia halo sala, liu-husi investigasaun mak foin bele hatene lista kuaze na'in 20 ne'e ba sa'e duni sintu ou lae.
"Ita hein rezultadu investigasaun mak foin bele hatene se mak sala ou se mak lae", nia relata.
Nia afirma, deskonfia ba sa'e sintu, tanba tuir informasaun ne'ebe enkamina barak liu, husi UPF rasik, balun Polisia bai-bain no balun imigrasaun.
"Mais purtantu ita haruka ona ba, buat deskonfia de'it, rezultadu investigasaun mak sei desidi tebes ou lae", Nia esklarese
Nia dehan, lista Membru PNTL ne'ebe deskonfia ba sa'e sabuk ne'e, Ministru Interior (MI), Taur Matan Ruak mós hatene ona.
"Sim, Ministru Interior hatene, tanba nia mos simu hotu lista hirak ne'e, hanesan foin dadauk deputadu sira fo sai iha Parlamentu, buat hotu hein rezultadu investigasaun", nia akresenta.
Ironia maka Vise Ministru Interior la sita membru PNTL sira ne'ebe ba jura mos ba arte Marsiais no ritual seluk.
"Lolo'os vise Ministru mos presiza dehan sai membru PNTL ou kuadru bo'ot sira ne'ebe ba juramentu KORK ne'e. La'os dehan de'it membru sira ne'ebe ba sa'e sintu mas dehan sai mos sira ne'ebe tuir KORK," dehan membru PNTL ne'ebe husu www.tempotimor.com labele fo sai nia identidade. (*)