Prezidente KRAM Octavio da Conceição hateten, diseminasaun informasaun ne'ebé KRAM hamutuk ho Komandu PNTL Munisípiu Dili halo iha suku Manleuana ba komunidade no juventude sira ne'ebé involve iha arte marsiais.
"Diseminasaun ba komunidade no juventude arte marsiais sira iha suku Manleuana, atu la'o tuir prosedimentu ne'ebé VIII governu liuhusi Sekretáriu Estadu Juventude no Desportu (SEJD) iha," Prezidente KRAM dehan iha sede suku Manleuana, Sesta (4/12).
Nia mós husu ba joven sira atu prepara aan hodi hola parte iha desportu atu hamorin Timor-Leste nia naran iha mundu.
"Imi tenke haree ba ita-nia joven ida naran Teofilo, ne'ebé sai Primeriu lugar iha kompetisaun Paralympic ne'ebé nia konsege manan ema ne'ebé recor mundiál, nia bele hetan rihun $100," nia dehan.
Iha fatin hanesan, xefe suku Manleuana Jacob Tilman Soares hateten, joven sira iha suku Manleuana ne'e husi organizasaun balun mak lakohi koopera ho autoriedade lokál husi 2018 to'o agora.
"Iha ne'e arte marsiais hotu kontribui no ida de'it mak lae, komesa 2018 to'o agora de'it, bolu hodi dialogu mós lakohi hotu, maibé sira seluk ne'e ita bolu tuur hamutuk ko'alia rona," Xefe suku ne'e hateten.
Entretantu suku Manleuana iha aldeia sanulu hanesan, Badiac, Efaca, Lemocari, Lisibutak, Lau-Lora, Mauc, Mane-Mesak, Manelauana, Mundu Perdidu, Ramelau ne'ebé ho totál populasaun 13.492 ho totál uma-ka'in 2.618, alende ne'e suku Manleuana nia médida maizumenus 7.3 kilometru kuadradu.(*)
