Prosesu kapturasaun ne'e hala'o liuhusi operasaun entre polísia eskuadra Na'in-Feto hamutuk ho unidade tránzitu munisípiu Dili nian iha área tasi-tolu iha oras madrugada.

Komandante PNTL munisípiu Dili, Superintendente Xefi, Henriques da Costa informa, iha loron 28 dadeer-san madrugada iha duni akontesimentu ida iha merkadu Taibessi nian ne'ebé maka joven ida hetan sona husi ema balu.

Nia dehan, bainhira ekipa patrullamentu sira simu informasaun husi sentru operasaun distrital (delta base) nian, polísia eskuadra Nain-Feto ba to'o kedas iha fatin akontesimentu hodi halo identifikasaun katak iha duni vitima ida hetan sona no toba latan hela iha rai.

Hafoin halo tiha identifikasaun, ekipa patrullamentu komunika kedas ho parte emerjénsia ambulansia ninian ba kedas iha fatin akontesimentu hodi transporta vitíma ba iha Hospital Nasional Guido Valadares (HNGV), maibé bainhira to’o iha Ospital, la konsege salva vitima nia vida.

Nia haktuir, bainhira ekipa patrullamentu fila husi Ospitál, tenta buka tuir suspeitu, no konsege hetan informasaun katak iha duni ema joven ida ne'ebé maka deskonfia involve iha kazu refere, maibé sees-aan ona husi fatin akontesimentu.

Tanba ne'e, parte servisu informasaun polisia nian kontinua buka tuir kedas no ba kontaktu mós ho ita nia parte tránzitu ninian iha tasi-tolu hodi halo passa revista no konsege hetan duni joven ida ne'ebe maka deskonfia maka'as involve iha kazu refere.

"Tanba ne'e maka ita foti kedas joven ne'ebé mak ita deskonfia ne'e, ita lori mai halo prosesu no agora daudaun kumpri hela oras 72 hodi kompleta ninian file, hodi oras ida kontinua ba iha ministériu públiku", Komandante PNTL munisípiu Dili, Superintendente Xefi, Henriques da Costa hateten iha nia knaar fatin Kaikoli, Segunda (30/11).

Nia hatutan, polísia sei nafatin rekolla tan dadus tanba tuir informasaun ne'ebé PNTL hetan katak involve mós ema seluk ida tan, tanba ne'e maka polísia sei promove kazu ne'e ba to'o iha Ministériu Públiku (MP) atu nune'e karik bele hetan mandadu kapturasaun hodi kaptura tanba nia identidade iha ona, maibé sei hein hela mandadu.

"Depois suspeitu ne'ebe maka ita identifika ho nia inisial JDA ho kode MF, suspeitu ne'e agora daudaun iha sela detensaun polísia ninian para hodi kontinua ninia prosesu", nia hateten tan.

Iha sorin seluk, vítima nia alin, Pedro dos Santos hateten, nia maun Ernesto dos Santos, tun husi postu administrativu Likidoe mai Dili, iha loron rua antes, bainhira kalan leba modo ba faan iha merkadu ema sona.

"Iha kalan nia to'o tiha mota ulun, nia haluha hela moskiteiru atu falun modo, ne'e maka nia fila-fali mai, kalan arruma tiha sasán, nia atu fila-fali ba iha terminal Taibessi ne'e, depois sira tuur hemu tua ne'e maka ema sona nia", nia konta tuir.

Entretantu, matebian Ernesto dos Santos moris iha loron 8 fulan Agostu tinan 1986 nu’udár oan mane ba dala-tolu husi maun-alin na'in lima, mai husi aldeia Lebumeta suku Berlu postu administrativu Likidoe munisípiu Aileu.

Matebian mate husik hela nia kaben ho oan nain haat ho idade mioria sei kiik-oan. (*)

PUBLISIDADE