Halo deteinsaun ba suspeitu na’in rua ne'e, tanba TVB no DP deskonfia halo korelasaun servisu ba malu hodi fasilita utuliza internet ilegál ne’ebé uza satelite Indonézia nian ho kapasidade 600MBS ne’ebé fasilita ba liña ministériu sira inklui Komandu Polisia Nasionál Timor-Leste (PNTL).
Nune'e, detein suspeitu na’in rua ne'e tuir despasu Tribunál Distritál Dili (TDD) ho NUK 0166/20/PSIC hodi halo mós primeiru julgamentu iha Tribunál Dili.
Iha loron segunda, 23/11/20, suspeitu CEO Kompañia Telemor TVB, SIK halo detein iha ninia servisu fatin Telemor, Timor Plaza CBD 4, andar tolu iha oras tuku 15:00, no suspeitu DP Diretór Kompañia Elite Komputer, SIK halo deteinsaun iha ninia servisu fatin Colmera Dili, iha oras 14:45.
Iha deteinsaun, ekipa SIK halo kedas esplikasaun ba kontiudu karta deteisaun hosi Tribunál nian ba suspeitu no ekipa funsionáriu tomak, inklui halo investigasaun ba sistema ka data center no sitema Call Cenrter Telemor nian iha andar rua CBD-2.
Nune'e mos ekipa SIK hamutuk ho ekipa Teknology Information (IT) halo apreensaun hodi husu pasword ba kontrolu ba sistema date center ne’ebé deskonfia durante kompañia Elite Kompute utiliza hodi halo koneksaun sistema rede satelite ilegál hosi Atambua-Indonézia nian.
Ezekuasaun mandadu buska dentensaun hala’o direita hosi Komandante Servisu Investigasaun Kriminá (SIK), Superintendente Xefe, José Maria Neto Moc akompañia hosi ekipa investigador SIK no hetan apoiu hosi Servisu Informasaun Polísia (SIP).
Impaktu hosi servisu korelasaun entre suspeitu na’in rua hodi fasilita servisu internet ilegál ne’ebé Servisu Investigasaun Kriminál deteta hahú kedas hosi tinan 2012 mai to'o tinan 2018 fó prezuiju ba Estadu Timor-Leste lakon osan barak.
Ho hahalok suspeitu nain rua ne’e, Ministériu Públiku akuza suspeitu rua komete kazu burla informatika no kazu fraude fiskál.
Durante ne’e Kompañia Elite Komputador mak manan konkursu halo koneksaun internet ilegál hodi halo korelasaun servisu ho suspeitu TVB, maibé parte Governu Timor-Leste liu hosi Autoridade Nasionál Komunikasaun (ANC) ne’ebé hetan fasilidade previleziu hosi Estadu Timor-Leste la halo kontrolu ba servisu kompañia rua ne’ebé fó prejuizu ba estadu Timor-Leste. (*)
