Portavós ne’e esplika, asidente no insidente sira ne'ebé akontese halo ema barak kanek no balun mate, maibé la prezudika situasaun teritóriu tomak, nune'e iha teritóriu nasionál situasaun kontroladu.
"Semana kotuk mosu insidente tolu, ida akontese iha Likisa, ne'ebé mosu violénsia doméstika hodi rezulta kaben feto hetan kanek no daudaun ne'e prosesu iha hela Polísia nia liman. Alende ne'e insidente seluk ne'ebé akontese iha Dili postu administrativu Kristu Rei, ne'ebé rezulta fen kanek todan," Arnaldo hateten Liuhusi konferénsia imprensa iha Kaikoli, Segunda (23/11).
Komandante ne'e mós dehan, sees husi insidente sira ne'e, akontese mós asidente balun ne'ebé rezulta ida lakon vida.
"Semana kotuk iha mós asidente tolu, ne'ebé rezulta ida mate, na'in 22 kanek kaman, daudaun ne'e halo hela tratamentu iha ospitál, entretantu motorista sira iha hela prosesu investigasaun, parte PNTL nian," dehan Arnaldo.
Alende husi situasaun sira ne'e, mosu mós dezastre naturais rua ne'ebé hamate ema iha Batugade postu Balibo, ne'ebé daudaun ne'e matebian iha ona familia sira-nia liman hodi halo serimónia funerál.(*)