Jenerál Lere Anan Timur espresa lia hirak ne’e hafoin relata servisu Falintil Forsa Defeza Timor-Leste nian ba Komandante Supremu Forsa Armada no Prezidente Repúblika Francisco Guterres Lú Olo iha palasiu prezidensial Aitarak Laran, Dili, Kuarta (11/11).

“Foin lalais ne’e ami mós halo dame ba Arte Marsiál sira iha área Laga no Baguia nian hanesan Nunira, Samalari, Sagadate, Lafateri entre PSHT, IKS no KORK ne’ebé sira halo juramentu ba rai-lulik, foho-lulik, Maromak no buat hotu, maibé juramentu ne’e dalaruma la dura,” Lere hateten.

Jenerál ne’e konsidera juramentu entre organizasaun arte marsiál sira ne’e la dura, tanba seidauk iha lei ne’ebé formaliza sira hanesan arte desportu ida.

“Juramentu ne’e dalaruma la dura, la to’o fulan, la to’o tinan sira tau malu fila fali, entaun ida ne’e mak ita buka, tanba saida! Tanba saida ita nu’udar Timor-oan ita halo juramentu, maibé ita la loyal ba ita-nia juramentu sira ne’e, maibé ita komete bei-beik krime!,” Lere kestiona.

Ba situasaun ne’e, Lider fitun rua ne’e husu ba governu atu haree no tau atensaun ba arte marsiál iha Timor-Leste.

“Ita-nia governu tenke haree kle’an kona-ba ezisténsia arte marsiais iha TL,” nia tenik.