Filomeno Paixão husu ne’e, relasiona ho dekretu governu ne'ebé fó ona oportunidade ba joven sira atu partisipa iha forsa obrigatóriu.

Tuir governante ne’e, lei ne'ebé halo ne'e atu dehan katak, ema hotu iha direitu no devér atu defende ita-nia rain.

"Dekretu lei ne'ebé foin sai dadauk ne'e, obrigatoriamente rekrutamentu militar ne'e, katak joven sira ne'ebé kompleta ona tinan 18, hotu-hotu ba resensiamentu, iha suku, servisu fatin no seluk tan nune’e nia hatete katak ha'u tinan 18 ona, prontu serví ha'u-nia nasaun," Ministru Filomeno hateten ba jornalista sira iha Kuartel Jenerál Fatuhada-Dili, Kinta (5/11).

Nia afirma, husi resensiamentu ne'e parte ida oinsa atu hakat ba rekrutamentu nian, tanba presiza ema ne'ebé prontu hodi sai militár.

"Rekrutamentu ne'e konsforme buat ne’ebé ha’u rona husi instituisaun katak, tinan ne'e rekrutamentu hira, depois MDS halo rekomendasaun, depois kada tinan atu rekruta ema hira ba militar obrigatóriu, bele iha 300, 600 ka 1.000, konforme infraestrutura no orsamentu," Filomeno esplika.

Alende ne'e kona-ba fatin ba militar obrigatóriu ne'e sei hala'o iha sentru formasaun instituisaun nian.