Portavoz Komandu Jerál PNTL Superintendente xefe Arnaldo Araújo hateten, komandu jerál fó ona orden ne'e ba KMD, tanba vítima Domingas nia oan feto Lim Dy Moy (Moy) kontinua hetan ameasa husi ema balun, tanba hakarak halakon tan Amoy husi mundu, hodi nune'e evidénsia sira bele lakon.
"Seguransa ne'e la'ós ba familia ne'ebá de'it, maibé ba kualkér ema ne'ebé mak hetan ameasas, espesiál hanesan agora, entaun PNTL nu'udár seguransa ida ne'ebé prontu asegura ema hotu," Arnaldo hato’o lia hirak ne’e liuhusi konferénsia imprensa iha Komandu Jerál PNTL Kaikoli, Dili, Kuarta (4/11).
Nia mós afirma, hakarak ka lakohi, ema ne'ebé hetan ameasa, tenke asegura.
"Kazu raikotu nian ne'e, komandu jerál orienta ona ba komandu munisípiu Dili oinsa koloka seguransa iha ne'ebá, tanba ne'e atu koloka ema ka, patrolamentu ka Ofesiál Polísia Suku (OPS) mak atu seguransa iha ne'ebá ne'e tékniku komandu munisípiu Dili nian," nia dehan.