Tuir Komandante Polísia Nasionál Timor-Leste (PNTL) Munisípiu Manufahi Superentendente Polísia Joni Viana, seguransa iha rai Manufahi la'o hakmatek, maibé violénsia doméstika iha Same mak iha númeru boot.

"Normalmente krime ka asidente ne'e sempre iha ne'ebé ita enkamiña ona ba Ministériu Públiku (MP), maibé kazu ne'ebé aas liu mak Violénsia doméstika tanba husi janeiru to'o mai agora ne'e iha 12,"dehan Komandante PNTL Munisípiu Manufahi, Superentendente Polísia Joni Viana ba www.tempotimor.com iha Same, Nu-Laran, Sábadu (30/10).

Komandante Municipiu ne'e mos haktuir nia preokupasaun kona ba ba asidente trafegu.

"Ita-nia motorista sira monu mesak, balun xoke malu entaun enkamiña ona Ministeiru Publiku, maibé balun rezolve tuir familia," dehan nia.

Komandante ne'e mós dehan, liga ba seguransa iha teritóriu munisípiu Manufahi bele dehan kontroladu, mezmu iha problema kiik balun.

"Parte seguransa iha Munisípiu Manufahi nian, la'o di'ak, mezmu iha problema kiik oan balun, maibé ida ne'e la prezudika movimentu populasaun no ema hotu iha liberdade ba sirlulasaun," katak Nia.(*)