Komadante Polísia Unidade Tránzitu Munisípiu Díli, Inspetor Polísia, Domingos Sarmento Gama husu ba komunidade sira presiza respeitu no kopera membru PNTL sira ne'ebé hala'o atividade iha terenu hodi garantia seguransa iha rai laran.

"Sidadaun sira ne'ebé la kumpri sinais tránzitu ou viola Lei kódigu estrada, Polísia tránzitu iha autoridade atu bele halo intervensaun pasa revista kualkér tempu", nia koalia ba jornalista iha Komandu PNTL Munisípiu Dili, Kaikoli, kinta (29/10).

Nia rekoñese katak, presiza duni respeita membru PNTL, tanba sira utiliza farda hanesan reprezenta estadu.

"Ita mos hakarak husu ba sidadaun sira, karik ita nia maluk sira kualkér Polísia husi ne'ebé de'it, liu-liu tránzitu, se sira tau farda halo seguransa iha estrada, ne'e hanesan reprezenta estadu tomak”, nia husu.

Tama ona iha tempu finadu, movimentu sa'e maka'as, komunidade sira mos la komprende, seguransa sira mos laiha tempu atu deskansa ho familia, tanba dever sira nian, nune'e husu komunidade respeita membru PNTL ne'ebé halo seguransa iha dalan.