"Sira utiliza atu asegura partimóniu jurídiku iha parte investigasaun, ne'ebé lei mak fó dalan. Kona-ba kontrola kilat sira ne'ebé iha PSIK, Ministériu Justisa (MJ) sei komunika ho parte defeza no seguransa atu halo kontrolu," José hateten lia hirak ne’e iha edifísiu Komisaun Funsaun Públika (KFP) Vila-Verde, Dili, Kuarta (28/10).

Nia esplika, PSIK uza kilat hodi proteze aan iha situasaun perigu bainhira ba halo investigasaun tanba lei mak fó dalan.

"Kona-ba kontrolu ne'e mekanizmu ida ne'ebé tékniku liu, entaun ita bele koopera ho instituisaun defeza no seguransa para kontrola," nia subliña.

Governante ne’e konsidera servisu PSIK nian ne'e todan, tanba ne'e siénsia ne'ebé atu investiga ba lokál krime nian, importante liu, tanba PSIK mós polísia ne’ebé ba tuir treinamentu kaer kilat iha Portugal.

"Estadu direitu demokrátiku ne'e buat hotu lei mak haruka, ne'ebé ita hakruuk ba lei. Se lei haruka ita halo kooperasaun, entaun ita presija duni halo kooperasaun hodi kontrola," nia dehan.

Antes ne'e Xefe Estadu Maiór Jenerál F-FDTL Majór Jenerál Lere Anan Timur hateten, bainhira mosu deskuidu se maka atu responsabliza, tanba F-FDTL ho PNTL la hatene.