PSIK Uza Pistola, Lider Seguransa no Governu Hahú 'Xoke Malu' Ideia

Doos kilat ne’ebe Governu sosa ba PSIK hahu sai husi X-Ray Aeroportu Dili Doos kilat ne’ebe Governu sosa ba PSIK hahu sai husi X-Ray Aeroportu Dili Foto Especial

Tempotimor (Dili)-Relasiona ho desizaun governu nian liuhusi dekretu ministeriál Ministériu Justisa (MJ) númeru 33/2017 iha 24 Maiu ne'ebé fó direitu ba Polísia Sientífika Investigasaun Kriminál (PSIK) hodi iza armas funu nian, maka lider seguransa nian hahú preokupa, tanba ema sivíl komesa uza ona arma funu nian.

Preokupasaun hira ne'e hato'o husi Xefe estadu maior F-FDTL Maijór Jenerál Lere Anan Timur, maibé xefe governu no Ministru Justisa (MJ) dehan lei mak fó dalan.

Tuir Jenerál Lere, Konstituisaun RDTL fó dalan, ba PNTL ho F-FDTL mak uza kilat, maibé governu komesa fó mós kilat ba ema sivíl.

"Kona-ba armas ne'e ita-nia konstituisaun RDTL fó dalan katak, instituisaun F-FDTL no PNTL mak bele kaer kilat, mais agora PSIK ne'e ha'u lahatene, nia sivíl ka polísia? Ha'u dehan nia la'ós polísia tanba foin dadauk kilat mai ne'e la liu husi polísia," katak Lere hafoin remata enkontru semanál ho Prezidente Repúblika (PR) Francisco Guterres Lú-Olo iha Palásiu Prezidensiál bairru-pite, Kuarta (14/10).

Lere mós konsidera situasaun ne'e sei fó perigu ba Timor-Leste, liuhusi loke dalan ba ema sivíl sira hodi kaer kilat.

"Aban-bainrua ida-idak sosa kilat, ida-idak hatama kilat. Agora PSIK ida foin dadauk simu kilat ne'e iha komandu polísia nian ka iha se nia okos, tanba ne'e governu tenke estuda didi'ak, tanba matéria funu nian la'ós buat halimar," nia tenik.

Tuir nian, loloos kilat sira ne'e tenke liuhusi PNTL mak distribui ba PSIK, mais agora ne'e PSIK mesak hola, entaun aban-bainrua organizasaun la'ós governu (NGO) mós bele rekezita kilat, se loke ona dalan hanesan ne'e.

Hatan ba kestaun ne'e, Ministru Defeza no Seguransa (MDS) Filomeno da Paixão de Jesus dehan, dekretu governu nian mak fó direitu.

"Instituisaun ne'ebé aprovadu husi Konsellu Ministru atu nia uza kilat, purtantu la'ós kilat boot no naruk, maibé sira uza pistola de'it no pistola ne'e ha'u rona dehan mai hotu ona ne'ebé ita implementa de'it," dehan Ministru Filomeno

Nia afirma, PSIK iha direitu atu uza porte de armas, tanba hetan autorizasaun husi KM, maibé regras empeñamentu la'ós tiru arbiru só uza iha tempu ne'ebé nesesáriu tanba PSIK halo servisu ne'ebé todan teb-tebes.

"Sira-nia servisu ne'e sufistikadu teb-tebes to'o krime sira ne'ebé la konsege detekta ne'e, só sira maka dekteta no sira bele hetan impedementu barak durante sira-nia servisu tanba ne'e maka estadu, governu hanoin no deside atu sira tenke iha protesaun ba sira-nia isin loloon," katak nia.

Maske governante ne'e dehan, dekretu ministeriál MJ nian mak fó direitu hodi PSIK kaer pistola, maibé Komandante Jerál PNTL Komisáriu Faustino da Costa atu haree fila fali legalidade ne'ebé iha.

"Atu dehan de'it katak, ida ne'e mak situasaun ne'ebé PNTL mós hetan, ne'ebé ita presiza haree didi'ak ba situasaun ne'e, liu-liu ba parte legalidade ninian," dehan Faustino.

Iha fatin hanesan, Primeiru Ministru (PM) Taur Matan Ruak katak, ema ne'ebé atu uza arma funu nian, presiza tuir formasaun de'it.

"Rekezitus báziku ne'ebé ema hotu hakarak lori kilat ka lei fó permite hodi lori kilat, ne'e nia kritéria mak treinamentu ka formasaun, ne'e importante para nia hetan sertifikasaun lori kilat nian," dehan PM Taur.

Xefe governu mós fó ezemplu katak, atu kaer kilat tenke iha formasaun, hanesan mós atu lori kareta presiza treinu.

"Formasaun ne'e importante, hanesan mós ita kaer kareta ita tenke treinu, kaer motor tenke iha treinu, entaun kaer kilat mós hanesan," nia dehan.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« November 2020 »
Mon Tue Wed Thu Fri Sat Sun
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

Tempo Timor Networks