Diretór ne’e dehan, natureza PSIK hanesan investigadór iha area kazu kompleksu no organizadu tanba ne'e pessoal PSIK presiza uza matenek laos uza armas bainhira halo servisu.
"Infelizmente kilat ne'e sosa ona, FM nia opiniaun intrega kilat ne'e ba PNTL no Falintil-FDTL mak utiliza, ita-nia esperansa PSIK uza nia kakutak de’it iha ambitu investigasaun kriminal, iha kazu ne'ebé kompleksu no organizadu," dehan João ba www.tempotimor.com via telemóvel, Kinta (15/10).
Tuir nia, iha istoria TL nian seidauk iha kazu ruma ne’ebé suspeitu ida oho membru seguransa sira ne’ebé halo investigasaun ba sira-nia kazu.
Tan ne’e, nia dehan, FM asaeita ho pozisaun Xefe Estadu Maior F-FDTL, Major Jeneral Lere Anan Timur ne’ebé hatete governu la merese sosa kilat ba PSIK.
Nia dehan, F-FDTL no PNTL ne’ebé maduru ona mós sei mosu kazu utilizasaun armas, sa tan PSIK ne’ebé sei nurak hela.
Tan ne’e, nia husu ba Parlamentu Nasionál atu bolu governu, liu-liu Ministériu Justisa hodi klarifika.