Print this page

Tauk ‘Funsionáriu ‘Na’ok’ Pontus Ezame, MEJD Husu PNTL Fó Seguransa

By October 15, 2020 1193

Tempotimor (Díli)-Liga ba produsaun pontus ezame nasionál ba finalista sira husi ensinu báziku no ensinu sekundáriu no ensinu tékniku vokasionál iha teritóriu Timor-Leste tomak, mak Ministériu Edukasaun Juventude no Desportu (MEJD) husu ona ba Polísia Nasionál Timor-Leste (PNTL) ati halo seguransa bainhira prodús hela matéria sira ne'e.

Pontus ezame ne'ebé dadaun ne'e MEJD produz ba finalista husi ensinu báziku, ensinu tékniku vokasionál no ensinu sekundáriu sira ne'e produz iha printing Silvia Dili, tanba nu'udar kompañia ne'ebé manan iha tenderizasaun hodi halo imprime ba pontu ezame sira ne'e.

Tuir Komandante PNTL Munisípiu Díli, Superindente Xefi Henriques da Costa katak, PNTL simu ona karta husi MEJD hodi husu apoiu polísia nian atu apoiu seguransa ba prodúz pontu ezame finál ba tinan 2020.

"Loos, ita hetan ona karta no ita orienta ona eskuadra Vera Cruz, para halo movimentu ba iha fatin impríme ninian, atu nune'e bele halo seguransa iha ne'ebá," hatete Henriques nia knaar fatin Kaikoli, Kuarta (14/10).

Komandante ne'e afirma, maske MEJD husu PNTL atu halo seguransa, maibé seguransa ne'e la to'o oras 24.

"PNTL sei la koloka seguransa ba 24 oras, tanba MEJD rasik iha ona sira-nia seguransa ne'ebé kolokadu iha ne'ebá, entaun ita-nian patrulla, ita halo movimentu iha ne'ebá, para atu nune'e bele kontrola, tanba karta ne'e ita foin simi horseik," dehan nia.

Entretantu orsamentu ne'ebé MEJD uza hodi halo kontratu ho kompañia Silvia Dili hodi halo imprime ba pontu ezame sira ne'e hamutuk dolar rihun $385 no durasaun ba imprime pontu ezame sira ne'e sei hala'o durante semana tolu nia laran.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items