Ho aktu ne'ebé membru seguransa sira, iha fronteira kometa ne'e, komandante F-FDTL, Major Jeneral Lere Anan Timur haktuir, líder husi instituisaun rua ne'e, deside ona, hodi halo transferénsia husi fronteira ba Rejiaun Leste inklui membru ida mak, Komandu Jerál PNTL deside duni sai.

"Fronteira mak problema oituan, tanba ita-nia ema ne'ebé halo seguransa mak viola regra sira ne'e. Entaun foin dadauk ha'u ho Komandante Jerál PNTL Komisáriu Faustino da Costa, ami ko'alia no iha ona lista lubuk ida ne'ebé involve ba ilegál sira ne'e," dehan Lere, iha Palásiu Prezidensiál, Bairro-Pite, Díli, kuarta (7/10).

Ba problema ne'e, Lere subliña, medida ne'ebé foti hasoru membru sira ne'e, mak duni sai no halo transferénsia.

"Medida hasoru sira mak balun duni sai, balun transfere ba Manatuto, Baucau, Viqueque no Lospalos, sira labele besik fronteira," dehan Jenerál Lere.

Lere akresenta, pesoál seguransa ne'ebé involve iha fasilitasaun ilegál ne'e, la'ós membru baibain, maibé balun komandante, balun ajente.

"Lista ha'u haree ne'e liu nain 10, balun komandante, balun ajente. Lista iha hotu ona, ida dalaruma sira duni sai ona, agora sira seluk ne'e mak kmaan, ne'ebé komadante dehan halo transferénsia de'it," nia tenik.

Jenerál ne'e afirma, maski F-FDTL mós iha fronteira, maibé husi komandu kontinua altera ba komandante sira, atu tau atensaun ba membru sira ne'ebé koloka iha fatin ne'ebá.

"Agora, iha Unidade Patrullamentu Fronteira (UPF) ne'e, la hanesan ho ami nian, tanba sira hela iha ne'ebá tinan ba tinan, la muda, entaun sira iha ábitu aat ida ilegál sira ne'e. Agora ami nian ne'e, kada fulan tolu ami halo rotasaun, ida ne'e mak ami-nia desizaun," dehan Nia.(*)