Tempotimor (Dili)- Tuir informasaun ne'ebé espekula iha públiku katak, iha rekrutamentu ba membru Falintíl Forsa Defeza Timor-Leste (F-FDTL) foun iha tinan 2021, ne'ebé sei rekruta mós eis-petisionáriu sira, mak Majór Jenerál Lere Anan Timur rejeita no konsidera informasaun ne'e falsu.

Tuir Xefe Estadu Maiór F-FDTL katak, eis-petisionáriu sira katuas hotu ona, tanbá ne'e, informasaun ne'ebé dehan, atu rekruta sira ne'e bosok, jornalista sira mak inventa de'it.

"Se mak dehan, eis-petisionáriu sira katuas tiha ona, ba rekruta fali katuas sira, agora ema ida idade 20 resin de'it labele ona, kuandu mais ha'u-nia alin petisionáriu sira. Sira ne'e tinan kiik liu mak 50," dehan Majór Jenerál Lere Anan Timur, iha Palásiu Prezidensiál Bairu-Pite, Díli, Kuarta (7/10).

Ba asuntu ne'e, Jenerál Lere konsidera, jornalista sira mak halo espekulasaun de'it.

"Imi hanoin to'ok, agora petisionáriu ida hanesan ha'u-nia alin Tara, nia ne'e katuas los ona. Ne'e imi (jornalista) mak inventa para imi-nia jornál sira folin, hodi hetan osan," dehan Lere.(*)