"Horikalan maizumenus tuku 19:00, ita simu informasaun katak iha asidente sona malu iha Raikotu entre kondutór husi mikrolete 010 na'in rua," dehan Henrique iha nia knaar fatin, Kaikoli, Kuarta (30/9).
Komandante ne'e afirma, motivu husi akontesimentu ne'e, tanba kondutór kazual setor osan la to'o tuir tarjetu ne'ebé kondutór permanente ne'e husu.
"Problema ne'e akontese, tanba kondutór permanente ba karreta mikrolete 010 ne'e fó kareta ba nia kolega kondutór kazual (vítima) ne'e, maibé komu setor ka tarjetu osan la to'o, entaun suspeitu ne'e sona kondutór kazual ne'e," nia katak.
Komandante mós afirma, bainhira akontesimentu ne'e mosu, komandu orienta kedas patrollamentu Dom Aleixo nian ba kedas terenu no halo kedas kapturasaun ba suspeitu NJX ha fatin akontesimentu.
Entretantu, vítima SD ne'e hela tratamentu saúde iha Ospitál Nasionál Guidu Valadares (HNGV) no suspeitu NJX iha hela sela PNTL Kaikoli hodi hein ba prosesu investigasaun. (*)