Deskonfia vitima sira hetan oho husi ema deskonesidu, iha Kuarta (30/9), tuku 06:00 dadder, iha sub-aldeia Aidahu, aldeia Reahatu, suku Laikore, postu administrativu Lacló munisípiu Manatutu.
Tuir David Alves, komunidade Aldeia Aidahu, Suku Laikore, vitíma na'in-rua ne'e hetan oho husi 'ema deskoñesidu' bainhira toba hela iha nia banin sira-nia uma iha Aldeia Aidahu.
"Ohin dadeer tuku 06:00, bainhira (vítima) nia-rian (ki'ik-oan) fila husi festa koremetan ida iha Aldeia Reahatu, ba to’o uma atu hariis ba eskola mak haree vitima na'in-rua mate latan hela iha rai no nia-aman kokorok kotu mas sei book a’an hela”, dehan David ba www.tempotimor.com, via telefone, Kuarta (30/09).
Tuir nia, vitima na'in rua, aman naran MS (29), oan naran MS (5). iha kalan ba hotu asiste festa koremetan ida iha Aldeia Reahatu neebé organiza husi nia banin sira rasik, no nia deside ho nia oan fila ba toba iha nia banin sira-nia uma iha Aldeia Aidahu, maibé depois dadeer komunidade sira haree vitima nain-rua mate latan hela iha sira-nia uma oin.
Entretantu, ho akontesimentu ne'e rasik parte komunidade sira kontaktu ona ba polísia no saúde Manatutu hodi kontinua prosesu tuir mai.
Tuir ofisial PNTL ida ne'ebe husu atu labele publika nia naran informa katak parte PNTL sei buka tuir informasaun lolo'os kona ba kazu ne'e no vitima na'in rua lori ona ba Ospital Nasional Guido Valadares Dili. (*)