Sekretariu Estadu hato’o kestaun ne’e bainhira partisipa iha serimonia koileta fore metan husi grupu feto Hametin Foho Tetuk iha aldeia Sadahur, Suku Maudemu, Postu Administrativu Tilomar, Munisipiu Kovalima.
"Husi inisiativas ne'ebé sira iha, parte SeKooP prontu atu hamrik iha sira-nia oin hatudu dalan oinsa atu hetan merkadu i hamrik iha kotuk oinsa atu reforsa sira ho ai-suak, katana, oinsa bele halo serbisu," dehan Elizário hafoin koilleta fore metan iha Sadahur, Sesta (18/9).
Elizario sente urgullu ho inisiativas husi grupu feto sira hodi hamutuk organiza malu husi kuda to’o koilleta fore metan.
"Atu agradese wain ba inisiativas feto sira, ida ne'e mak atu hatete katak feto sira mós bele," dehan Elizário.
Iha fatin hanesan, Team Leader Tomak, Patrice Charpentier hatete, Tomak servisu hamutuk ho governu iha munisipiu 6 hodi apoiu fini atu produs fore metan.
"Tomak ajuda fundu hodi fo ba grupu sira hodi produs fini hamutuk 34 toneladas iha Munisipiu 6," dehan Patrice.
Patrice esplika hafoin koilleta, sei lori ba ministeiru agrikultura no peskas nune'e sei distribui ba rihun 5 resin agrikultura iha Timor-Leste hodi sai hanesan fini iha tempu udan.
Nia hatutan, ba oin Tomak prontu kontinua suporta grupu sira konforme intendementu ho guvernu.
Entertantu koilleta fore metan, fore keli no fore tali iha grupu Hametin Foho Tetuk hamutuk hektares 8, ho rezultadu kada hektares 600 kilograma.