Komadante Jerál PNTL, Komisariu Faustino da Costa informa, sidadaun ne'ebé tama no sai ilegal iha fronteira maioria membru organizasaun PSHT ne'ebé ba hasa'e sabuk iha Atambua.

"PNTL iha Esatudu Emerjensia kaer membru ne'ebé ba sa'e sabuk, liu-liu, ita la'os generaliza, maibé ida PSHT ne'e halo kapturasaun 290 pesoas maioria iha kuarentina,” dehan Faustino hafoin reuniaun ho Prezidente Republika Francisco Guterres Lú Olo iha palasiu prezidensial, Kinta (17/09).

Nia dehan, membru PSHT ne’ebé tama mai husi Atambua, balun la’os foin ba semana ida ka fulan ida, maibé balun iha ne’ebá ona durante fulan haat resin.

"Sira la'os foin ba fulan ida ka semana ida ou rua, maibé balun Fulan tolu ou hat antes tiha ona, sira ba la'os grupu, maibé pesoas idaidak la'o ninian, sa'e bus ba de'it, depois ba mak idaidak buka dalan, tanba sira kontatu iha sorin, maibé sira fila ho grupu ne'e mak ita kaptura," dehan nia.

Nia hatutan, membru PSHT sira ne’ebé tama mai, balun liu husi rai maran no seluk uza ro.

“Bainhira halo kapturasaun, halo investigasaun, sira rasik deklara katak, sira ba maioria tama husi fronteira terestre, maibé atu fila mai, komu terestre taka metin, entaun sura uza fali bero ki'ik tama husi tasi, tanba ne'e iha tasi halo kapturasaun.”

Atu reforsa seguransa iha fronteira, Komandante PNTL ne’e dehan, nia parte destaka tan kompaña operasaun hodi fó apoiu ba Batallaun Orden Públiku (BOP) no Unidade Patrollamentu Fronteira (UPF).