Vise Ministru ne’e hatete, to’o ohin loron nia parte seidauk hatene envolvimentu pesoal seguransa balun iha kazu movimentu illegal iha fronteira ne’ebé sa’e maka’as iha fulan hirak ikus.

Maske tuir nia, movimentu ilegal ne'e konsensia ema ida nian, maibé nia tau fiar ba Komando PNTL hodi lansa intelejen no hein rezultadu investigasaun.

"Ba ha’u ita labele jeneraliza ema ruma iha kotuk, mais kuandu investigasaun hetan ka iha intelejen ruma hetan ema, iha evidensia, ne'e kestaun seluk fali ona," dehan Antonio iha Kuartel Jeral PNTL Kaikoli Dili, Tersa (15/9).

Antonio hatutan, bazeia ba deklarasaun dirijente PSHT katak organizasaun la orienta no la autoriza nia membru sira atu ba sa’e sintu iha Atambua, Indonezia.

Tan ne’e, tuir nia, membru PSHT sira ne’ebé tama Indonezia liu husi dalan illegal uza rasik sira-nia konsensia.

"Dala-ruma bele individu ke iha konsensia nia hakarak ba rasik, ne'e la presiza ema ruma iha kotuk par apoiu sira ba,” dehan Antonio.

Molok ne’e, parte seguransa kaptura membru PSHT lubuk ida ne’ebé koko atu fila fali mai TL hafoin tuir ezame sa’e sintu iha Atambua.