Adora Ema Estranjeiru, PNTL Kaptura Ema 40

Grupu Natureza Labarik ho nia portavoz ne'ebé PNTL Munisípiu Dili kaptura iha suku Madohi, Postu Administrativu Dom Aleixo, Munisípiu Dili. Grupu Natureza Labarik ho nia portavoz ne'ebé PNTL Munisípiu Dili kaptura iha suku Madohi, Postu Administrativu Dom Aleixo, Munisípiu Dili. Foto Facebook

Tempotimor (Dili)-Polisia Nasionál Timor-Leste (PNTL) Munisípiu Dili, liuhusi servisu investigasaun no operasaun eskudra Dom Aleixo, kaptura grupu Natureza Labarik hamutuk na'in 40, inklui sidadaun estranjéiru ida ne'ebé sira adora.

Komandante Munisípiu Dili, Superentendente Xefe Henrique da Costa hateten, grupu ilegál Natureza Labarik adora sidadaun estranjéiru ida, maka PNTL halo kapturasaun ba sidadaun sira ne'e, iha Suku Madohi, Domingu (13/9).

"Horseik ita-nia investigasaun hamutuk ho patrullamentu Munisípiu Dom Aleixo ne'ebé konsege sobu rede ida naran Natureza Labarik iha Aldeia Rosário, Suku Madohi, no ita kaptura ema na'in 40, kompostu husi mane na'in 32 no feto na'in ualu," dehan nia, iha nia knaar fatin Kaikoli, Segunda (14/9).

Nune'e, Komandu PNTL mós kaptura sidadaun estranjeiru ne'e tanba halo aan hanesan Maromak.

"Kazu hanesan iha tinan 2014, iha Manleuana, ne'ebé halo sira-nia aan hodi ema hotu ba adora, entaun ninia hahalok ne'e mak akontese tan, depois iha sira-nia reza ne'e dehan buat ne'ebé la akontese ne'e sei akontese," nia tenik.

Komandante mós afirma, PNTL rekolla hotu ona dadus no informasaun sira husi grupu ilegál ne'e para aprezenta ba Ministériu Públiku (MP), iha tempu badak.

"Iha operasaun horseik ne'e, ita la konsege hetan sasán kroat ruma, maibé ita hetan bandeira RTDL rua, FRETILIN rua no FALINTIL ida, osan, ai-han hanesan fós no seluk tan," katak nia.

Nia hatutan, sidadaun timorense sira ne'ebé hetan kapturasaun, maioria mai husi Munisípiu Baucau ne'ebé nia koordenadór na'in rua ho inisiál DJ no VD.

Alende husi sidadaun sira ne'e, iha mós sidadaun estranjéiru ida ne'ebé durante ne'e grupu Natureza Labarik adora ne'e han didi'ak de'it.

"Señora ne'e só han de'it mak foos mean, ikan karik tenke ikan mas mean no seluk tan," tenik Hendrique.

Nia subliña, sidadaun estranjéiru AA ne'e husi nasaun viziñu Indonézia ne'ebé laiha pasaporte no seluk tan, tanba ne'e sei koordena ho parte imigrasaun hodi haree kestaun ne'e.

Entretantu, sidadaun sira ne'ebé PNTL kaptura ne'e konsetra iha Dili hahú iha 30 Agostu to'o horseik, depois PNTL Munisípiu Dili kaptura no dadaun ne'e iha hela sela detensaun PNTL Kaikoli.(*)

Rate this item
(6 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.