Tuir Segundu Komandante PNTL Munisípiu Dili, Superintendente Asistente PNTL Euclides Belo, PNTL halo kapturasaun ba sidadaun sira ne'e tanba la kumpre lei manifestasaun nian iha artigu 5, Lei Númeru 1/2006.
"Iha loron Sesta semana kotuk (4/9), iha tuku 10:00 dadeer, Komandu PNTL Munisípiu Dili liuhusi eskuadra Vera-Cruz halo kapturasaun ba juventude no universitáriu sira husi Universidade oioin ne'ebé hamahan aan iha Front Rakyat Maubere untuk West Papua hamutuk na'in 16, tanba halo fali demonstrasaun iha Embaixada Indonézia, nia oin," dehan nia, iha nia knaar fatin Kaikoli, Segunda (7/9).
Komandante ne'e afirma, komandu orienta halo kapturasaun, tanba viola regra manifestasaun nian.
"Regra manifestasaun nian iha lei númeru 1/2006 iha artigu 5, metru 100 husi edifísiu públiku sira, maibé sira halo kedas iha embaixada nia oin, entaun komandu orienta halo kapturasaun," nia tenik.
Nia esplika, antes ne'e Front Rakyat Maubere untuk West Papua ne'e halo ona enkontru ho komandu, nune'e husu sira atu halo manifestasaun iha Tasi-Tolu, tanba sidadaun sira ne'e lakohi obediénsia, tanba ne'e viola mós kódigu penál artigu 244 ne'ebé ko'alia kona-ba dezobediénsia.
Entretantu daudaun ne'e sidadaun sira iha hela sela detensaun PNTL Kaikoli hodi kumpre oras 72, nune’e sei entrega ba Tribunál Distritál Dili hodi submete ba primeiru interrogatóriu.
Sidadaun husi Front Rakyat Maubere untuk West Papua ne'ebé hetan kaptura ne'e hotu mane. (*)