Tuir informasaun husi parte Polisia Nasionál Timor-Leste (PNTL) RNDJ-KRDTL deside kansela asaun kontra PR Lú-Olo tanba kestaun seguransa no tanba mós sira-nia massa neebé sira tarjetu la to'o.

Portavoz Komandu Jerál PNTL Superentendente xefe Arnaldo Araújo informa, grupu RNDJ-KRDTL halo enkontru ho parte PNTL no kansela ona sira-nia asaun pasifiku neebé tuir planu sei hala'o iha Tasi Tolu.

"Ohin marka tan prezensa señora Ángela Freitas ho nia grupu iha ne'e, ko'alia kona-ba sira-nia planu atu halo demostrasaun, maibé tanba de'it kestaun seguransa rai laran, tanba ne'e sira rasik husu atu adi'a fali iha futuru," dehan Arnaldo ba jornalista sira remata audiénsia ho grupu RNDJ-KRDTL, Kuarta (02/09).

Kona-ba bainhira mak grupu RNDJ-KRDTL atu halo fali manifestasaun, Portavoz PNTL nee dehan, grupu RNDJ-KRDTL sei hasoru fali komandu bainhira sira hakarak halo manifestasaun.

"Bainhira mak sira atu halo fali, sira sei mai hasoru fali PNTL. Tanba ne'e iha dia 4 agora sei laiha demostrasaun tanba sira rasik mak kansela, la'ós PNTL mak kansela, tanba de'it sira-nia manifestante sira seidauk prontu atu halo manifestasaun," nia dehan.

Entretantu, bainhira jornalista sira koko atu konfirma portavoz RNDJ-KRDTL, Ángela Freitas, kona-ba razaun kansela manifestasaun, maibé iha pesoal PNTL balun ne'ebé taka dalan ba jornalista sira atu halo intrevista.

"Imi labele entrevista nia iha ne'e, imi hakarak entrevista nia, ba iha nia rezidénsia, labele intrevista iha ne'e," dehan pesoal PNTL ne'e.

Hafoin liu minutu balun, jornalista sira konsege hetan konfirmasaun husi Ángela, no Angela hatete katak, sira kansela tanba TL lao ona ba nasaun ditadura.

"Ami kansela ami-nia demostrasaun tanba ita haree ba situasaun horseik nian ne'ebé hahú implementa ona ditadura, depois F-FDTL mak halo fali serbisu PNTL nian, entaun halo membru RNDJ-KRDTL iha munisípiu 12 inklui RAEOA kestiona maka'as," dehan Ángela.

Angela afirma, povu ne'ebé durante ne'e, grupu RNDJ-KRDTL rekolla ona asinatura hamutuk 200.087, katak maioria povu deskontente ona ho xefe estadu ne'ebé viola ona konstituisaun RDTL.

HAKARAK HATENE PARTISIPASAUN MAUN BO'OT XANANA GUSMAO NIAN IHA PREVENSAUN COVID 19?  FAVOR AKOMPANIA VIDEO IHA KARAIK NE'E.

<iframe width="560" height="315" src="https://www.youtube.com/embed/0uXuwzjCkMk" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>