Komandante Jerál PNTL, Komisáriu Faustino da Costa hateten, kazu Baukau liuliu iha parte Laga ne'e PNTL identifika ona autór loos hamutuk na'in 6.
"Kazu iha Baukau ne'e ha'u atu dehan de'it hanesan ne'e, ida iha Vila Nova ne'e iha autór ida ne'ebé kumpre hela prizaun preventiva tanba iha kaptura suspeitu ne'e iha Dili," dehan Komjer PNTL, ba jornalista sira, iha Palásiu Prezidensiál, Kinta (27/08)
Nia hatutan, kona-ba kazu iha Laga, suspeitu balun entrega aan, balun hetan kapturasaun husi autoridade seguransa.
"Kazu Laga nian ne'e autór balun mai entrega aan, balun PNTL ba kaptura, ne'ebé hamutuk na'in 22, maibé ita deteta katak, iha na'in 6 mak hanesan autór prinsipál ba kazu ida ne'e, ne'ebé ita hein hela prosesu," nia dehan.
Entretantu, kazu ne'ebé akontese iha Vila Nov, Baukau iha loron 12 Agostu ne'ebé rezulta Leonel Freitas kanek iha parte kotuk no iha parte Laga iha loron 13 Agostu ne'ebé rezulta komunidade nia uma hamutuk 12 mak hetan sunu inklui motór ida no karreta ida ne'ebé hetan estragu. (*)
