Nia dehan, ekipamentu ne'ebé menus ba PNTL iha munisípiu sira hala'o servisu, la'os komputadór de'it, maibé inklui karreta patrullamentu no fasilidade seluk tan.
"PNTL halo relatóriu hakerek ho liman la'ós iha Manatutu de'it, maibé fatin hotu-hotu kuaze hanesan. Tanba ne'e, baibain ba vizita mai halo relatóriu Ministru Interiór hanesan Primeiru Ministru, maibé ita hein desizaun ida ne'ebé nia hanoin prioridade liu atu hadi'a uluk", dehan António, hafoin reuniaun Konsellu Ministru, iha Palásiu Governu, Kuarta (26/08).
Nia argumenta, kestaun menus fasilidade hirak ne'e problema boot ba servisu PNTL nian, tanba prejudika ba sira-nia servisu.
"Menus ekipamentu sira ne'e hotu sai problema boot halo servisu PNTL nian atraza, tanba komputadór no karreta laiha, ne'ebé importante ne'e nesesidade báziku ne'ebé tuir loloos sira tenke iha, kuandu laiha hanesan ne'e problema", dehan nia.
Nia hatutan, kada tinan Orsamentu Jerál Estadu (OJE) aloka ba PNTL, maibé fasilidade hanesan komputadór no karreta patrollamentu atu hala'o servisu la konsege sosa, tanba orsamentu utiliza fali ba konstrusaun edifísiu PNTL, kazerna no halai liu-ba manutensaun karreta no inklui ínternet.
Ho kestaun hirak ne'e, Ministériu Interiór (MI) sei haree para bele hadi'a hodi fasilita servisu PNTL nian iha futuru.
Entretantu, realidade PNTL sira hakerek relatóriu ho liman no la'o ain hodi halo patrullamentu ne'e daudaun akontese iha polisia Nasionál Timor-Leste (PNTL) Eskuadra Soibada, Munisípiu Manatutu.
Komandante Eskuadra Soibada Interinu, Sarjentu Dahuluk Carolino do Carmo informa, durante fulan 6 ona komputadór iha sira-nia fatin avaria, tan ne'e sira obrigadu hakerek de'it relatóriu ho liman.
Aleinde ne'e, membru polisia iha eskuadra ne'e mós tenke la'o ain de'it hodi halo patrullamentu tanba sira-nia karreta patrullamentu aat ona. (*)
HAKARAK HATENE PARTISIPASAUN MAUN BO'OT XANANA GUSMAO IHA KOMBATE COVID 19 LOKE VIDEO IHA KARAIK NE'E.
<iframe width="560" height="315" src="https://www.youtube.com/embed/0uXuwzjCkMk" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>