Tempotimor (Dili)-liga ba kazu hatalik aan ne'ebé komandante jerál Polísia Nasionál Timor Leste (PNTL) Komisáriu Faustino da Costa deklara iha semana kotuk, katak na'in lima, iha semana ida ne'e mós munisípiu Ermera kontinua rejista kazu hatalik aan.

"Semana kotuk ha'u dehan ona ba ita-boot sira kona-ba kazu hatalik aan, maibé foin tama de'it iha fulan Agostu loron balun, maibé akontese tan kazu hatalik aan na'in rua kedas iha munisípiu Ermera," dehan Komjer PNTL Komisáriu Faustino da Costa ba jornalista sira iha Palásiu Prezidensiál bairu-pite Dili, Kinta (06/08)

Komjer mós dehan, kazu rua ne'e, kazu ida familia kontinua prosesu ba Ministériu Públiku (MP) maibé ida seluk labele, tanba matebian moras mental.

"Kazu rua ne'e, ida familia hato'o ba Polísia katak, matebian ida hatalik aan tanba moras mental, entaun ita la prosesu, maibé ida seluk, ita halo ona prosesu autopsia, depois rezultadu ita hein husi Ministériu Públiku (MP)," nia tenik

Entretantu kazu hatalik aan ne'ebé komjer deklara iha semana kotuk hamutuk lima, rua husi munísipu Ermera, Dili no Baucau. Nune'e husi kazu ne'e na'in rua nia kazu mak iha ona Ministériu Públiku.