Print this page

PNTL Kaptura Autór Na'in Rua Hana Estudante UNPAZ

Situasaun iha UNPAZ hafoin ema sona estudante ida Situasaun iha UNPAZ hafoin ema sona estudante ida Foto file


Tempotimor (Dili) - Relasiona ho akontesimentu hana estudante Universidade da Paz (UNPAZ), iha segunda (3/8), Polisia Nasionál Timor-Leste (PNTL) kaptura ona autór na'in rua.

Reitór UNPAZ Adolmando Amaral hateten, suspeitu nai'n rua ne'ebé hana Alfredo (estudante UNPAZ) daudaun iha hotu ona PNTL nia liman hodi hala'o prosesu investigasaun.

"Kazu ne'ebé akontese horisehik ne'e, vitima no suspeitu iha hotu ona polisia, kazu ne'e iha li'ur depois sira buka malu tama to'o kampus maibé, horseik ami entrega ona ba polisia ne'ebé polisia mak hala'o ona nia servisu investigasaun," dehan nia, iha Tersa (04/08).

Akontesimentu sira ne'e, tuir nia, dala barak akontese ba joven sira maibé, depois nia impaktu tama to'o universidade.

"Akontesimentu sira hanesan ne'e, fofoun hahú uluk iha UNPAZ depois ba DIT ba UNDIL kontinua ba IOB agora fila-fali mai UNPAZ", dehan Adolmando.

Reitór ne'e mos husu ba parte seguransa PNTL atu buka tuir karik iha autór intelektuál balun mak hakarak hamosu situasaun sira hanesan ne'e.

"See akontese tanba de'it situasaun ha'u hanoin ne'e laiha buat ida maibé, see ema ruma mak iha kotuk halo senáriu ida ne'e, ha'u hanoin governu liuhusi polisia intelijénsia sira buka tuir kaer autór intelektuál ida ne'ebé dezeñu buat sira ne'e", nia dehan.

Hafoin akontesimentu hirak ne'e, nia dehan, agora iha halo ona moru haleu aredor UNPAZ, halo portaun, monta CCTV para bele ba oin antesipa ka asegura ba kazu sira hanesan ne'e labele akontese tan no prosesu aprendizajen daudaun la'o normál nafatin. (*)  

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com